Rreth Nesh

KUSH JEMI NE?
Qendra e Rinisë Rurale (Rural Youth Hub – RYH) – RYH është një platformë e aktivizmit rinor që mbështet të rinjtë, veçanërisht ata të zonave rurale, që të ushtrojnë zërin e tyre për të ndikuar politikëbërjen bujqësore dhe rurale, për t’i bërë këto procese të orientuara dhe të lidhura ngushtë me shqetësimet, interesat dhe prioritetet e të rinjve. Qendra përfshin të rinj, studentë, sipërmarrës, fermerë etj., që janë entuziastë dhe të motivuar për të marrë një rol aktiv dhe për të kontribuuar në proceset e zhvillimit rural dhe vendimmarrjen vendore.
Krijimi i RYH u nxit dhe mbështet nga Rrjeti Shqiptar për Zhvillimin Rural për të mundësuar të rinjtë të përfshihen në zhvillimin e qëndrueshëm të vendit, dhe në veçanti në transformimin e komuniteteve të tyre rurale. ANRD beson në rolin e rëndësishëm të rinisë shqiptare në zhvillimin dhe progresin e vendit tonë. Që prej dhjetorit të 2019, ANRD nisi të formojë platformën e Qendrës së Rinisë Rurale (RYH) me qëllim shprehjen e zërit të të rinjve në Shqipërinë rurale duke promovuar vetë-aktivizimin e rinisë rurale.

Pse RYH?
Politikat publike në Shqipëri si në nivel qendror edhe në nivel vendor kanë qenë joefektive për të adresuar çështjet që lidhen me përfshirjen e të rinjve në bujqësi, si dhe me trendin gjithnjë në rritje të migrimit të tyre. Pavarësisht rolit dhe kontributit të rëndësishëm të të rinjve, migrimi i tyre është një nga sfidat më të mëdha dhe risku kryesor i qëndrueshmërisë për të gjithë sektorin e bujqësisë dhe zhvillimit rural, si dhe të sigurisë ushqimore.

Koha dhe sfidat e saj kërkojnë politika që pasqyrojnë nevojat dhe përparësitë reale të rinisë rurale, dhe që orientohen nga aspiratat e të rinjve për të ardhmen rurale. Ndaj ka rëndësi të kuptuarit e situatës aktuale të rinisë rurale (nevojat dhe përparësitë) si dhe aspiratat dhe ëndrrat e tyre (vizioni për të ardhmen) për komunitetet rurale. Për ta bërë këtë, duhet mbajtur një qëndrim thelbësisht i ri ndaj realitetit rural – vështrimi i botës rurale nga perspektiva e rinisë. RYH mund të kontribuojë shumë në këtë drejtim!

Historia
RYH u themelua më 11 dhjetor 2019 – Ditën Ndërkombëtare e Maleve, gjatë workshopit udhëtues të organizuar nga ANRD ‘Realiteti i të rinjve në zonat rurale ndërmjet sfidave dhe aspiratave për të ardhmen’. Ky udhëtim dy ditor shënoi nisjen e lëvizjes rinore rurale në Shqipëri drejt përmirësimit të mirëqenies dhe zhvillimit të qëndrueshëm të jetesës në zonat rurale. Të rinjtë pjesëmarrës diskutuan mbi realitetin, nevojat dhe sfidat e të rinjve shqiptarë, aspiratat dhe dëshirat e tyre. Ata reflektuan edhe rreth mënyrës që politikat rurale mund t’i përgjigjen perspektivës së tyre; çfarë mund të bëjë rinia për të ndikuar në proceset dhe reformat e fushës për të përmirësuar jetesën dhe të ardhmen në zonat rurale. RYH synon të bëhet zëri i rinisë së Shqipërisë rurale dhe të promovojë vetë-aktivizmin e saj.

Cila është veprimtaria jonë?
Qendra e Rinisë Rurale (RYH) si një platformë aktive në mbështetje të të rinjve ruralë, bazohet në shkëmbimin e eksperiencave, njohurive dhe ndarjen e vizionit për të ardhmen e komuniteteve rurale.
Qendra e Rinisë Rurale përbëhet nga antarë të cilët kanë aktivitete të ndryshmë si në bujqësi, në turizëm, shoqërinë civile, dhe synon të bëhet një qendër e cila mbledh të gjithë sipërmarrësit e rinj ruralë, idrejton, i orjenton dhe bëhet zëri i tyre për realizimin e politikat në zhvillimin rural.

Projekti Rural Albanian Youth (RURAL-YOU) dhe RYH
Projekti Rural You është një projekt i finacuar nga Bashkimi Evropian që synon forcimin e përfaqësimit të interesit të të rinjve ruralë dhe kontributin në zbatimin e axhendës së anëtarësimit të Shqipërisë në BE në sektorin e bujqësisë dhe zhvillimit rural.
Ky projekt synon të përfshijë të rinj ruralë të motivuar për të luajtur një rol aktiv dhe për të kontribuuar në zhvillimin rural dhe proceset e vendimmarrjes duke rritur pjesëmarrjen e të rinjve në jetën shoqërore, ekonomike dhe politike të komuniteteve rurale. Projekti i mundëson rinisë rurale të jetë e vetëdijshme për mundësitë që ekzistojnë në nivel sektori, të marrë pjesë në mënyrë aktive në rritjen e qëndrueshme të territoreve të tyre dhe të ngrejë zërin e saj në arenën publike.
Duke pasur një synim të tillë, ‘Rural You’ është projekti i parë që i përgjigjet nismës së Rrjetit Shqiptar për Zhvillimin Rural për konsolidimin e Qendrës Burimore të të Rinjve Ruralë si një përvojë pilote për të angazhuar të rinjtë që jetojnë në zonat e largëta rurale në veprime rrjetëzuese. Projekti synon të aftësojë RYH që të kthehet në një platformë mundësuese për rininë rurale për t’u angazhuar në proceset e zhvillimit rural, për rrjetëzimin me shoqërinë civile, profesionistët nga e gjithë Shqipëria dhe advokim për nevojat e tyre.
Projekti Rinia Rurale Shqiptare është një ftesë për të parë botën rurale nga perspektiva e të rinjve si dhe u mundëson të rinjve ruralë të jenë të vetëdijshëm për mundësitë në sektor, të marrin pjesë në mënyrë aktive në rritjen e qëndrueshme të zonave të tyre dhe të jenë aktivë në procese vendimarrëse.